Na codia de Europa, unha das lúas de Júpiter, existe auga en estado líquido cun volume similar ao dos Grandes Lagos de Norteamérica, segundo descubriu un equipo de investigadores da Universidade de Texas en Austin (Estados Unidos). O achado foi publicado en Nature e supoñería un paso "significativo" para a busca de vida fóra da Terra, segundo os expertos.
A auga encóntrase encerrada dentro da codia xeada do satélite e segundo a autora principal, Britney Schmidt, podería representar un hábitat potencial para a vida e poderían existir moitos máis lagos nas rexións pouco profundas da codia de Europa. Ademais, o recén descuberto lago está cuberto por plataformas de xeo flotante que parecen estar a colapsar entre si, proporcionando un mecanismo para a transferencia de nutrientes e enerxía entre a superficie e a auga baixo o xeo. Isto podería facer de Europa e o seu océano "lugares habitables", conclúen os investigadores.
Os científicos centráronse en imaxes tomadas pola nave espacial Galileo de dúas áreas circulares na superficie de Europa, chamadas "caos". Baseándose no que conoemos a partir de procesos similares que teñen lugar na Terra, nas plataformas de xeo e baixo os glaciares sobre volcáns, os investigadores desenvolveron un modelo de catro pasos para analizar as características do terreo en Europa. Tras a análise, realizáronse varias observacións contraditorias: algunhas parecían indicar que a capa de xeo é grosa e outras que é delgada.
Debido a que os lagos se encontran a varios quilómetros baixo a superficie, a única confirmación real da súa presenza chegará tras a misión dunha futura nave espacial deseñada para explorar esta capa de xeo. A devandita misión foi cualificada como a segunda en prioridade, segundo o último informe 'Planetary Science Decadal Survey', e actualmente está a ser estudada pola NASA.
No hay comentarios:
Publicar un comentario