Ademais da Lúa, a Terra tivo "minilúas" xirando arredor

Un equipo de astrónomos da Universidade de Helsinki, o Observatorio de París e a Universidade de Hawái simularon o paso de 10 millóns de asteroides xunto á Terra e chegaron á conclusión de que, grazas á gravidade, debeu atrapar algún pequeno obxecto celeste e que, nalgún momento, ademáis da Lúa, houbo polo menos unha "minilúa" dun metro de diámetro xirando en torno ao noso planeta. Segundo a simulación, os asteroides que a Terra puido capturar non xiraban en círculos, senón seguindo unha complexa traxectoria definida simultaneamente pola gravidade da Terra, a de Lúa e a do Sol. A "minilúa" típica podería ter xirado arredor do planeta azul durante 9 meses, aínda que algunhas poderían ter acompañado a Terra durante décadas.


A simulación puido ser realizada grazas ao uso do superordenador francés Jade. "Nun ordenador persoal normal tardariamos seis anos en facer o mesmo", explicou Jeremie Vaubaillon, coautor do traballo que publica a revista científica Icarus.


"As minilúas son cientificamente moi interesantes", engade o seu compañeiro Robert Jedicke, que considera que unha minilúa podería regresar algún día á Terra achegando aos astrónomos "un modo sinxelo de examinar unha mostra de material que non cambiou moito dende os comezos do sistema solar hai 4.600 millóns de anos"